5月6日，周二。恒生指数升78.18，收26262.13；成交697.3亿元。5月期指升106点，收26180点。过去四十五天系好友大反攻嘅日子，恒生指数由3月18日20572.92上升到5月5日高点26387.37，升幅28.3％，出现上述升幅后，股市牛皮一段日子无可避免。5月5日嘅26387.37系熊市二期反弹高位，抑或调整后再升？事后才知道。

　　从美股VIX睇，上阻力渐渐出现，即大市欲再上升嘅话，将面对举步维艰局面。未来日子市场进入个别股份严重分化期，股份因本身因素而出现个别发展，全面上升嘅日子基本上结束，大市进入参差走势，总之七上八落、乱七八糟。响呢段日子正是玩stock picking嘅时候。圣经有云：选出麦子、弃掉莠子。美元大幅下跌后嘅今天，能源股、资源股价钱已唔便宜，系咪值得再追？经过去六个月高科技股大调整后，系咪又到咗可吸纳嘅日子？金融股又点？次按风暴系已经过去，还是只系风眼？

熊二不乏投资机会

　　内地房产方面，响五一黄金周，北京及天津成交只较去年同期减少10-20％，而价格仍坚挺；苏州及杭州连成交额亦上升；上海比较弱，但价格仍企稳；重庆三天内售出四百多单位，表现令人振奋；珠三角一带比较弱，尤其广州及深圳，似乎仍有下调压力。内房股如首创置业（2868）、中渝置地（1224）、中国海外（688）、绿城中国（3900）、新世界中国（917）、华润置地（1109）等，由3月低价至今升幅都大于恒指。由此可见熊市二期亦不乏投资机会。

　　沪深三百指数跌1.11％，收4010.89，由4月22日3122.39上升到5月6日最高见4062.66，升幅30.1％，今天出现调整好正常。熊市二期升幅可以系前跌幅31.8％、50％或61.2％，最终升幅几多？事后才知道。

　　北京师范大学金融研究中心主任钟伟估计，家吓喺中国境内嘅热钱规模可能突破6500亿美元，较1996年年底东南亚热钱5600亿美元更多。爆发亚洲金融危机后，1997年下半年至98年年底流走嘅热钱数目达8000亿美元。中国要小心热钱未来突然流走嘅问题。

　　南京大学金融与保险学系主任于润教授认为，自去年10月份起中国对美国出口增速开始下滑，由13.5％降至11月份嘅12％、12月份6.8％、今年1 月份5.4％，到2月份更为负5.2％，3月份反弹至16.3％。反而同欧盟贸易仍在上升，今年首季升24.7％（3月份升35％）。1985至89年南韩圜升值25.3％、新台币升值50％，并冇令南韩及台湾经济受损。佢认为，人民币喺未破六前，中国仍处于升值繁荣期，热钱短期内唔会流走。

　　花旗推介信义玻璃（868），估计今年每股获利57仙，升40.2％，O九点四倍，目标价10.3元。

　　我老曹同其它人意见上最大分歧，系比较上唔太担心未来通胀率。我老曹唔相信类似七十年代嘅滞胀会重演，因为今天嘅联储局已较七十年代聪明，唔会再次让 CPI出现双位数字升幅。我老曹亦唔相信九十年代日式经济会响美国重演，因为贝南奇较三重野康有智能。但经济盛衰循环却无可避免。投资策略首先系避免响经济见顶时过分投入，亦要避免喺经济见底时过分恐慌，上述不能单靠运气，而要透过投资策略运用及严守纪律。我老曹自己永远唔会响恒生指数O 二十二倍以上过分投入，如因此而错过机会亦唔会后悔；亦唔会喺十二倍以下过分恐慌，即使明知短期不利；依家恒指O企响十五倍左右。我老曹唔认为商品价格狂升系中国或印度因素，亦唔认为食物价格上升系因为美国乙醇计划。真正理由系美元汇价下沉，令大量对冲基金要搵出路，大量对冲基金资金追逐商品价格，结果造成滔天巨浪！喺一上一落中，有人得有人失。换言之，商品价格狂升暴跌，The tail is wagging the dog嘅反常现象！

　　中国人民大学马克思主义学院教授陶文照认为，一个国家嘅兴起，首先系文化同价值观改变，令生活方式、意识形态改变，呢方面叫做「软实力」。上述改变渐渐令经济繁荣起来，再建立军事实力，呢方面叫做「硬实力」。硬实力有助推销软实力，令该国文化及价值观获其它国家认同，进一步巩固该国响世界上嘅经济地位，进而强化军事力量。换言之，平服天下必需软硬兼施。其中软实力响令大国崛起方面担当嘅角色更为重要。美国强大，理由系世人皆认同美国文化及价值观，因而学习美国人嘅生活方式，受美国意识形态所支配。今天嘅可口可乐文化、麦当劳文化，甚至荷里活音乐、电影及电视文化、互联网文化，喺一D国家开始受到抗拒及唔受欢迎，而美国就使用军事力量去维持文化霸权，例如伊拉克战争。令人担心嘅系呢次次按危机将可能动摇美国响经济上嘅霸权，一如互联网文化最近喺香港嘅艳照门事件引来冲击，将令世人重新评估美国嘅软实力。

传圣火反映文化矛盾激化

　　第二次世界大战结束后，日本、南韩、东南亚等国家直接仿效美国制度。九十年代东欧国家亦放弃学习苏联，选择咗美国；仲有印度同南美洲。即使喺撒哈拉次大陆四十八个非洲国家中，亦有四十多个接受美式多党制选举。九十年代可以讲系美国软实力嘅全盛期，接近人人学习美式自由民主制度及市场经济制度。可惜随之而来却系日本经济停滞不前、亚洲金融风暴、2000年科网股泡沫爆破及2007年次按危机！反而唔肯接受多党制嘅中国经济却欣欣向荣，人们开始质疑美式自由民主制度系咪放诸四海皆准？

　　美式文化过分强调个人英雄主义，唔系超人就系乜乜救地球、享乐主义（包括借钱消费）、甚至滥交主义（所有美国电影、电视、音乐、广告都强调呢点），同伊斯兰教义及中国儒家思想背道而驰。中国一向强调牺牲小我、完成大我，克己而服礼，为未来而储蓄，响性方面更极之保守。二十一世纪世界冲突早已由资本主义与共产主义之争，转为西方基督教文化、东方儒家思想及以中东为首嘅伊斯兰教文化冲突。由于儒家思想主张兼容，与西方文化矛盾仍未激化；但基督教文化与伊斯兰教嘅文化冲击愈来愈白热化。近日有迹象系东方嘅儒家思想同中东伊斯兰教文化走在一起，共同对抗西方基督教式文化，呢点由「中国威胁论」、「中国崩溃论」响西方大受欢迎足以证明。呢次传圣火正正反映出唔同价值观激化矛盾表面化。

　　西方民众认为西藏人权遭到侵犯而向中国政府抗议，佢地嘅口号系「Free Tibet」（令西藏自由），而非「Independent Tibet」（西藏独立）。如以物质生活睇，改革开放后嘅西藏物质生活较达赖统治时期唔知好几多倍，中国人实在唔明白西方民众所指西藏人权到底系乜嘢？

　　东方民族过去二百年长期遭受西方列强欺压，物质生活缺乏（睇睇鸦片战争后嘅中国），人民长期生活喺饥寒交迫之中。对东方民族而言，「人权」就系人民生存权，追求温饱嘅生活（1982年内地官员来港劝港人唔好移民外国，理由系祖国保证1997年后港人一定有饭食！）。反之，西方民众长期喺物质富足中过活，佢地嘅人权系指个人自由及政治权利获保障，因此佢地义不容辞地加入「Free Tibet」大队。

人权问题被利用作反华

　　如中国政府唔好好处理东西方对「人权」嘅分歧，对中国经济前景将大大不利，好容易被别有用心嘅人利用作反华，因为中国崛起正挑战西方过去喺世界嘅领导地位，好容易变成东西方冲突！今天嘅中国冇足够力量与西方列强搞对抗，应避免走上往日苏联之路。

　　中国政府应压抑内地人嘅民族主义，例如抵制家乐福乃十分幼稚嘅行为，此乃狂妄自大嘅表现。唔好以为改革开放三十年中国真系超英赶美，二百年前英国响工业革命上嘅伟大思想，一百年前美国喺新发明上嘅贡献，才令佢地建立世界强国地位。今天中国响经济实力上仲差好多，响产生伟大思想上接近交白卷。中国只系全球嘅OEM或ODM而已，连日本亦不如。

　　西方科学发展建基于西方人求是、求真，对唔同意见包容与证伪嘅历史，利用法律去保护少数及异见。中国人连容纳意见嘅雅量都未培养出来，一个毛泽东居然可发动十亿人民大搞文化大革命，真系匪夷所思。中国人连反对别人意见、尊重别人发言权亦做唔到，都几令人痛心。现代化最重要一项思想现代化，从呢次圣火传递睇都几令人失望。

　　去年8月次按危机，因联储局介入而令大部分人认为冇事，令道指响去年10月创新高。今年3月17日联储局介入令JP摩根大通可收购贝尔斯登，唔少人认为信贷不履行交易（credit default swaps）或其它场外交易衍生产品冇事，因为一旦出事，联储局便会用纳税人嘅蚊年去救援（bailout）。

　　我老曹唔系认为政府不应干预市场，而系应该遵守当年香港财爷夏鼎基嘅积极不干预原则——即系话如非必要最好唔干预。中国人认为严父出孝子、慈母多败儿，因此唔少中国父亲揸住大碌竹追住个仔成条街嘅事件不断发生，1989年六四事件政府更出动坦克车去对付手无寸铁嘅大学生……。我地认为严父系啱嘅、慈母系错嘅。我地需要强势领导、今天中国人已站起来，外国人不得依牙松弶。过去中国五千年强调严父政策下，扼杀咗下一代嘅创意，例如中国人书法只能模仿古人，中国人嘅画亦系仿古，未敢创新。只有模仿前人才唔会撞板，结果令中华文化由过去嘅先进变成今天嘅落后。因为中国政府一向干预市场，中国严父则干预子女发展。积极不干预就系一方面让市场有发展空间、让子女可发挥自己所长，另一方面又不偏离常轨。一如响咖啡中加奶，多则遮盖咖啡香味，少则不能发挥奶味之滑，必须恰到好处。

严父政策扼杀下一代创意

　　最理想当然系政府唔使出手，市场自动调整。但市场亦非完美，如果有人操控以从中谋取暴利而政府任由市场发展，往往由一极端走向另一极端，咁就需要政府喺适当时刻出手纠正。以八十年代为例，1982年嘅国际银行危机、1984年Continental Illinois危机、1987年10月股灾；到1994年墨西哥危机、1997年亚洲金融风暴、1998年长期资本管理出事。二十一世纪亦有2000年 3月科网股泡沫爆破、2001年「九．一一惨剧」及2002年英隆事件，以至2007年8月次按危机、2008年3月贝尔斯登事件，都需要政府出手去干预。

　　一个过度监管（Over-regulate）嘅市场死气沉沉，一个监管不足（De-regulate）嘅市场又危机四伏。呢次次按危机后，我地应进入再监管（Re-regulate）市场。一如英隆事件后，美国将工业股内唔列入资产负债表嘅投资行为（off-balance- sheet investments）列为非法。次按危机之后，结构性投资工具（SIV）相信将受一定程度嘅监管。未来监管机构对杠杆式投资，相信亦有一定程度上嘅限制，以便让衍生产品健康地发展同时唔会拖垮整个金融体系。至于呢段日子需时几耐（纠正英隆事件亦需时三年）便木宰羊。