4月16日，周三。恒生指数跌22.98，收23878.35；成交646.2亿元。4月期指升22点，收23870点；5月期指升32点，收23714点，仲系低水。短线弱势格局一时难改，市场交投清淡，投资气氛涣散。

　　内地已停批一年几嘅QFII，已有五十二家海外机构获批进入中国证券市场，总投资额102.95亿美元。虽然有上述消息，内地A股仍未止跌。

　　沪深三百指数跌2.49％，收3494.02，因中国人行决定4月25日起上调存款准备金率0.5％，至16％。今天长江电力跌10％停板，云南铜业亦跌停。

有仔唔好恨做大明星

　　John Paulson成为去年最高薪嘅对冲基金管理人，收入共37亿美元，跑赢索罗斯嘅29亿美元，以及第三名James Simon嘅28亿美元。全球首二十五名基金经理去年平均收入8.92亿美元，较2006年升68％。今时今日有仔唔好恨做大明星，一定要做对冲基金经理。许冠杰三十年前首歌：「做老千好过做皇帝，前世。」今天应改为：「做对冲基金经理好过做皇帝，靓仔！」　　今年美国唔系进入经济衰退期，而系进入 GDP丝路至温巴仙增长时代！估计今年标普五百指数纯利平均跌6％，O由二十倍下降到十五倍；反之，每日指数波幅可超过2％，投资策略宜保守【图】。熊市二期每次见底便强力反弹，第一季表现最出色系公用股，因为利率下降，4月份应系最后一次减息，即公用股上升期又差唔多矣。至于商品股我老曹睇唔通，农产品股亦一样。

　　2000年1月至02年10月，标普五百指数O下降咗23％；去年10月至今，指数O只下降14％，估计仍可再跌10％（加上纯利回落6％，即后市美股跌幅仍有15％）。战后至今美股熊市平均跌幅32％，日子共三百八十四个交易天。如上述有参考价值，美股熊市应响明年第一季才结束，家吓约完成一半左右。

　　瑞信推介中保国际（966），估计今年每股获利57仙，减少47.3％，O三十一点五倍，目标价23.53元。

不可任何东西都想要

　　花旗推介新宇亨得利（3389），估计今年每股获利18仙，升29.2％，目标价4.1元。因为中国对高价表需求十分殷切，而该公司计划将零售点由2006年嘅九十二间增加到2010年嘅三百间。

　　一个人只有两只手，可以攞得住嘅实在有限，因此不能任何东西都想要。黎瑞恩曾唱过一首歌《一人有一个梦想》，事实的确系咁，一生人只做好一件事，咁就成功机会好大；反之样样想，但你只有两只手，又点可以攞得住咁多？英语亦有云：「Choice, not chance, makes life different」。人生过程中，每一个抉择决定你嘅将来，而非所谓机缘巧合或运气。人人所作抉择不同，最后结果人人唔一样。过去每一个抉择皆影响你嘅今天，今天你嘅抉择亦将影响你嘅将来。

　　例如我老曹相信依家系熊市二期，恒指响20000至25000点上上落落。上落市唔易玩，因此连放响分析股票方面嘅时间今年都减少咗。另一方面，我老曹仍偏爱美元及外币，至今冇人民币存款（虽然明知实赚）。上述点点滴滴，最后必影响我老曹未来所拥有嘅财富。一个人只有两只手，喺一生中你又攞得住几多？

　　行止兄曾批评我老曹：「你除咗数目字外，其它一窍不通。」我老曹亦曾努力学习欣赏马友友嘅表演，但系锁你，现场环境实在太舒服，我老曹去咗搵周公。我老曹亦好努力学习欣赏西班牙舞后表演，但睇咗成晚，都唔识得欣赏佢好喺边度？我老曹亦曾去过伦敦睇舞台剧，一如我太太评语，佢地着住D烂衫烂裤表演，点解入场券卖得咁贵?!到巴黎红磨坊睇表演，亦唔明白点解巴黎美女中有咁多黑妹演员？我老曹嘅天分可能只喺捕捉趋势上，而非欣赏艺术。

　　詹瑞文兄决定脱离政府资助佢嘅PIP公司，响财政上宣布独立，此乃好事。去年我老曹曾同詹兄合作舞台剧（平时佢都几忙），见到佢已筋疲力竭，响沙发上呼呼入睡十五分钟，醒来后又龙精虎猛。反观我老曹念台词念咗四个钟后，已经好想去死。詹兄一踏上舞台便生鬼得很，完全处于享受状态；我老曹一踏上舞台却呆若木鸡，好多时左右不分。詹兄注定系食呢行饭嘅人，至于我老曹都系对住D数字好D。偶然玩票一次Cross over，可令人生多D色彩，但唔好被台下掌声欺骗咗，以为自己连舞台剧都得？由始至终，我老曹并冇艺术天分（中学时代音乐呢科接近肥佬）。詹兄嘅一生应贡献畀舞台，我老曹祝福佢成功。

趋势酝酿而未成形

　　闲话少说。2008年最头痛嘅地方系How to make Profits in Sick Economy。2008年首季已经过去，本港基金表现平均数系负增长，至于我老曹成绩亦唔比基金公司好，即系略有亏损。

　　响上落市中挑选跑赢大市股份，并非想象咁容易，即使睇市正确，拣唔中上升股份一样冇钱赚。毕非德所教方法──别人恐慌你贪心，别人贪心你恐慌，就更难做到，最多只能做到别人恐慌时你唔惊，别人贪心时你唔贪已经好叻，因为we are all human，都有人性弱点。

　　今年不妨放开 D，因为好多趋势仍在酝酿而未成形（潜龙勿用）。人生中失去一次机会，仍有无数机会等住你；反之，一次重大错误决定，往往翻唔到身。年轻时一个错误决定，可以损失几十万元；中年时一个错误决定，可以失去几百万元；踏入老年，作出一个错误决定代价就更大，此乃点解年纪渐大，投资策略一定倾向保守嘅理由。请唔好尝试outsmart the market。

　　乜嘢盈喜亦系过去嘅历史，今年第一季业绩较去年第一季好已冇乜刺激，问题系今年第三季业绩系咪较去年第三季好才重要。股市冇过去，只有将来；炒股票唔系炒过去业绩，而系炒前景展望。嗰D去年10月冇及时减持者，更喺投资研讨会上努力 talk up the market去抵销个人嘅恐惧感，可惜股市从来唔因多人睇好而上升，亦唔会因多人睇淡而回落。股市上升理由系因为人人想入货，股市回落理由系人人想出货而未果。今天有边个仲坐拥巨资等入货？持货睇好则不值一哂。

　　今天投资银行、对冲基金及其它非接受存款机构所提供嘅贷款早已超过传统银行，但经过次按危机后，以佢地嘅贷款能力，系咪仍好似去年8月之前同样进取，例如杠杆比率达到一比三十（即1元资本、做30元借贷）？如果一如传统银行返回一比十二（1元资本做12元贷款），有几多贷款将从市场上消失？

由高PE走向低PE

　　踏入2008年，全球金融面对反杠杆化（de-leverage），简单D讲就系信贷收缩。上述情况以美国影响最大，欧洲少D，亚洲区又少D。去年8月前嘅资金泛滥情况已结束，近期各国央行努力注资亦无法扭转此大趋势，只能让信贷市场收缩有秩序地进行，而非无秩序式撤退。上述影响唔系一季两季，甚至唔系一年两年，而系未来大趋势，可令美国同欧洲GDP长期陷入低增长期。标普五百指数PE正由二十点三五倍走向低PE；反而欧洲上述问题唔大，因PE已喺十点七二倍水平。从高PE走向低PE方法有二：一、企业纯利保持增长，而股市指数不前，例如1966至82年美股。二、企业纯利不前甚至回落，股市指数大跌，例如1990至2003年日经平均指数（依家已跌至PE十五倍）。至于沪深三百指数点样完成由高PE走向低PE？由于依家PE仍高达二十七倍，一旦中国GDP增长率下降，股市要跌到边个水平才有真正支持？家吓恒生指数平均PE系十四点七倍。今天欧洲Dow Stock 50平均PE十倍，恒指PE十四点七倍，表面睇唔算贵，但纯利中几多来自物业升值重估？剔除物业升值后，恒生指数PE绝对唔便宜（起码冇欧洲及日本咁便宜）。何况抵买绝对唔系投资嘅理由。恒生指数已进入上落市，即升幅有限、波幅无限。

　　油价高企、食物价格高涨，欧洲同北美洲银行及大金融机构则忙于集资，因为今年第一季亏损已令资本充足比率不足。响咁嘅环境下，后市可升几多？去年下半年几多股份高价被绑（以香港每天成交平均800亿元计，一百二十个交易天，即有九万六千亿元股票喺市场高价易手）。大量股份高价被绑，形成今年股市进入短期供不应求，呢个拉锯局面可维持几耐？冇人可预知。

　　深圳市国土房产局发布「2008年一季度深圳房地产市场发展分析报告」，3月份房价平均13618.42元一平方米，较2月份回落16.53％，已重返去年4、5月嘅水平。今年1、2月平均房价分别为15080.25元及16314.58 元，销售面积较2月上升194.57％，证明减价后吸引买家重新入市。

　　3月份美国新建房屋跌至十七年低点，住宅方面回落5.2%，相等于每年一百零一万间；新批合约更少，跌至年率九十七万间，系1991年8月以来最低。美国全国建屋商协会估计，今年建屋量将减少30%，较先前估计嘅27%更大。

中国设厂与全球比较仍具优势　　根据中国人行今年向五千四百八十四间企业调查结果，今年第一季生产成本指数表现十分差，较去年第四季下跌28.3％（去年第四季下跌3.9％），或较一年前下跌15.8％。原材料涨价、利息成本上升、人民币升值、劳工不足等等，都系构成上述指数下跌嘅理由。工业边际利润今年 1、2月只有16.5％（去年同期37％），因生产成本上升；2000年至今超过二百间韩国企业从成都市退出。香港工业总会话有超过六万间香港或台湾厂商撤出珠三角，部分响中国其它地区再建厂，部分则迁离中国。

　　由广州市调查所得，二百五十二间企业今年首季支付工人工资1160元人民币一个月，较一年前升13％；深圳升幅约为20％。至于东莞嘅香港及台湾厂家支付工人工资每月多200至400元人民币左右。平均而言整个珠三角二亿工人今年获加薪200元人民币，上升20％，至约1375元一个月，但同全球比较仍系underpaid！响珠三角开厂仍有工资廉宜嘅优势。

　　土地方面，由于地方政府继续提供廉价土地去吸引投资者，好多时地价收入不足以支付基建，即变相仍然在补贴厂商。

　　至于能源成本，2002至06年国际能源成本每年平均上升29％，中国汽油及电力指数呢几年平均每年上升8.5％，成为另一变相补贴。

　　今年人民币贷款利率仍低于CPI升幅，去年利率系负利率1.5％（即低于CPI 1.5厘）。

　　环保方面，中国亦唔见得较其它国家严格。

　　换言之，今年响内地设厂，条件已唔及过去优厚，但同全球各地比较仍享有优势，只系优势已唔及过去咁大。例如出口退税由2006年平均12.11％降至 2007年平均8％，今年再进一步下降。人民币合理汇价应系5至6元兑1美元，即内地工厂仍享有汇率优势，只系一步步在减少中。

打工好过做老板

　　同美国比较，中国生产成本仍便宜70％（中国劳工成本唔及美国5％），情况有如七十年代嘅南韩及台湾。今天南韩劳工成本系美国49.7％、台湾系 25.8％，人均收入由七十年代初期少于2000美元一年到2007年南韩14100美元、台湾13450美元。响未来三十年，中国劳工成本仍唔及今天南韩及台湾（因中国劳动人口多），但唔排除未来日子内地劳工成本按年上升10％到20％。未来外贸收入愈来愈大部分由中国人民分享而非厂商。八十年代外贸收益55％归厂商，九十年代收益48％归厂商嘅日子成为过去，愈来愈多收益将归工人嘅日子已经来临，只要过渡期平稳，睇嚟问题唔大。

　　今天香港除咗地产、金融及受保护嘅公用事业外，其它行业早已进入打工好过做老板时代。就以报馆为例，过去十年几多间报馆结业？例如《快报》、《华侨日报》，几多间报馆股权易手？例如《星岛》、《明报》、《成报》，甚至《信报》。几多行家仍在辛苦经营？例如《成报》同《新报》；过去十年有冇新血加入报馆行业？答案系多咗三份免费报纸，包括《都市日报》、《am730》、《头条》。除《都市日报》外，另外两份至今仍未赚钱。做老板可以发达时代早已过去，血本无归时代则早已降临。最近例子如甘泉航空，投资超过7亿元，却喺两年内蚀清光。今时今日响香港做老板发达已成为极少数，血本无归反成大多数。反观中国，依家仍处于做老板可以发达时代。

　　■上海证大房地产（755）、泰山石化集团（1192）停牌。